بث الوسائط المتعددة لازم يموت

أنا مندهش ان لسة فى طريقة بث المحتويات الفيديو و الصوت عن طريق الـ Plug-ins. لازم حد يعلن موت الطريقة الغبية المتخلفة دي. المواقع العربية مفهوم لية, عايشة فى التسعينيات الوسطى، عصر الريال بلاير و خلافة من العك الدوت كومى.

المواقع دى مقرفة جدا ، شكلها عامل زى الناس المتمسكة بالشريط الكاسيت فى عصر الأى بود.

كان مفهوم لية موضوع البلاج انز (حتى مفيش ترجمة معقولة للكلمة دي) أيام الدوت كوم السوداء أيام الموطم الموترولا المعفن و كروت الانترنت شهد الحمقاء. المواقع كانت معتقدة ان المستخدم لن يحتفظ بنسخه من الفيديو على صلبه. و الشركات معتقدة انها كدة تسعى للسيطره على تليفيزيون المستقبل. أنا عن نفسى أسعى للسيطرة على أى مذيعة من تليفيزيون المستقبل. و هو ده سر شرائى لجهاز جى بى اس و تعلمى للتنطيط البهلوانى للكرات.

الجديد هنا، أن البييب -- وهو موقع محترم جدا بالرغم من أستخدامه للريال بلاير-- بيبحث موضوع خطير جدا. موضوع ثورى يكسر كل الأعراف. البييب سيضع وصلة مباشرة للملف الصوت على الصفحة. و يعامل ملف الوسائط المتعددة مثل أية ملف أخر.

أختيار بسيط و جميل.

ولكن نحن فى عصر المدونات و الآى بود و ملفات التغذية و الوب ٢,٠

فطبعا موضوع وصل ملف الصوت بالصفحة ده لازم يتحبش، انا أعترف ان انا أعتبر التحابيش دى مفيدة، و يرفق ملف الصوت مع ملف التغذية و يسمى البودكاست. اعادة أكتشاف التنزيل يجب ان تدمج مع مفاهيم حديثة.

البييب ليس أول موقع هام يختبر البودكاستنق، هناك مواقع كبيرة زى الأن بي ار و خلافة ماشيين على النهج البودكاستنقاوى. ولازم أذكر ان البودكاستنق تكنولوجيا ظهرت فى المدونات الأول. يعنى من تحت لفوق. تكنولوجيا من جذور الأعشاب.